Akarere ka Nyarugenge katangije ubukangurambaga bw’iminsi 16 mu kurwanya ihohoterwa rikorerwa abagore n’abakobwa Murenge wa Kanyinya, Akagari ka Nzove. Ibikorwa bafashwamo n’umufatanyabikorwa DUHAMIC ADRI Umuryango Nyarwanda utegamiye kuri Leta udaharanira inyungu wita ku majyambere y’icyaro mu mushinga USAID IGIRE JYAMBERE.
Muri ubu bukangurambaga, abatuye mu Kagari ka Nzove baganirijwe ku ihohoterwa rikorerwa igitsina ririmo kwangiza imyanya ndangagitsina,kutagira ijambo,gushyingira abana babakobwa bakiri bato,ihohoterwa rikorerwa ku mubiri harimo gukubitwa,guterwa imigeri, gukururwa imisatsi, ihohoterwa rishingiye ku mutungo…
Banaganirijwe ku ihohoterwa ribabaza umutima,rikomeretsa umutima, guhoza ku nkeke… Si iri hohoterwa ryaganiriweho banabwiwe zimwe mu mpamvu zitera ihohoterwa n’amakimbirane mu miryango n’imyitwarire idahwitse irimo ubusambo, guharika, gucana inyuma, ubwomanzi, ubuzimzi, kutita ku nshingano z’urugo n’ibindi.
Mu bibazo biterwa n’ihohoterwa mu miryango basobanuriwe ko abana bahura n’ihungabana no kugwingira, abana bakura nabi babona ababyeyi bari guhohoterwa, abana bagakura batabona urukundo mu rugo…
Banasobanuriwe ko icyaha cyo gusambanya umwana gihoraho kidasaza.Basabwa ko mu miryango yabo bakwiye kubyirinda. Banibukijwe ko iyo umwana yahohotewe umujyana kwa muganga uko ari, ntumwuhagira kugirango ibimenyetso bidasibangana.Basabwa ko buri wese agira umuryango ushoboye,utekanye (UUU).
Agatesi Marie Leatitia yavuze ko abagore batagomba kuba abasinzi kuko bafite inshingano zo gukurikirana no kwita ku rugo ati :”Ukurusha umugore akurusha urugo”,asaba abagore kwita ku nshingano zabo birinda ubusinzi n’ibindi bikorwa by’urukozasoni, agira ati ”N’abagabo barahohoterwa, turi mu buringanire mu iterambere ariko tugomba gukora inshingano z’abagore, z’ababyeyi mu miryango mu ngo”.
Umuyobozi Nshingwabikorwa w’Akarere ka Nyarugenge Wungirije, Uwamahoro Genevieve yasabye abaturage ba Nzove kugira umuryango ufite ubukire uzira amakimbirane n’ihohoterwa.
DUHAMIC ADRI muri gahunda yo kwimakaza Uburinganire n’ubwuzuzanye, barwanya ihohoterwa rikorerwa mu miryango ririmo ihohoterwa rikorerwa ibitsina byombi, bafasha imiryango kwirinda ihohoterwa bakanagira inama abakorewe ihohoterwa.
Marie Chantal Nyirabera
