Mu Muganda rusange usoza ukwezi kwa Gicurasi wahuriranye n’itangizwa ry’igihembwe cyo gutera ibiti n’amashyamba, hatewe ibiti ku muhanda wa Bweramvura, mu Murenge wa Jabana, mu Karere ka Gasabo mu rwego rwo kurimbisha umujyi.
Abawitabiriye bahawe ubutumwa bubibutsa akamaro k’amashyamba mu buzima bw’umuntu banakangurirwa kuyabungabunga.
Ubwo Mpabwanamaguru Merard Umuyobozi w’Umujyi wa Kigali wungirije ushinzwe Imiturire n’Ibikorwa Remezo ari kumwe n’itsinda ryaturutse muri Burkinafaso bifatanyaga n’abaturage mu muganda, yanakanguriye abaturage kwirinda ibiza biterwa n’imvura, kugira isuku, kugira uruhare mu itunganywa ry’ibishushanyo mbonera n’ibindi.
